දේදුන්නට ගල් ගැසීම හෙවත් අනවබෝධය

පෝස්‍ටු දමන්නට කොහොමටත් කම්මැලි අනේමන්දා හිටියේ මේ ගැන ලියන්නට නොවේ ය.ඒත් ඊයේ දු‍ටු blog අඩවියක් නිසා මේ සම්බන්ධව යමක් ලිවිය යුතු බව හැඟුණි.

මීට අවුරුදු කීපයකට උඩ දී සමලිංගිකයන් ගැන අනේමන්දා දැරූ ආකල්පය "අනේ අපොයි" යන්නයි.ඔවුන් සොබාදහමට පටහැනි ජීවී කොට්ඨාසයක් ලෙස සිතූ ඇය ඔවුන්ව පිළිකෙව් කළා ය.ඔය අතරේ දිනක් ඇයට අපූරු පොතක් කියවන්නට ලැබිණි.
පොතේ නම "ගැහැණු පිරිමින්ට වඩා මේ තරම් වෙනස් ඇයි".පරිවර්තනයක් වූ මේ පොතේ මුල් කෘතිය Allan and Barbara Pease යුවළ ලියූ  Why Men Don't Listen & Women Can't Read Maps: How We're Different and what to Do about it(1998) ලෝ පතළ මනෝවිද්‍යාත්මක ග්‍රන්ථයයි.
ගැහැණු සහ පිරිමි මොළවල වෙනස්කම් බොහොම තාර්කිකව සහ විද්‍යාත්මකව විග්‍රහ කොට තිබූ එහි එක් පරිච්ඡේදයක් වෙන් වුණේ සමලිංගිකත්වය ගැන විස්තර කරන්නයි.
සමලිංගිකයන්ගේ ලිංගික අනන්‍යතාවය බොහෝ විට ඔවුන්ට කලල අවධියේ දී ලැබෙන දෙයක් බවත්  ඇත්ත වශයෙන්ම එය ඔවුන්ගේ ‍තෝරාගැනීමක් නොව ඉබේ ලැබෙන්නක් බවත් එහි සඳහන් වුණා.

"මෙය කියවන පාඨක ඔබ විරුද්ධ ලිංගිකයන්ට ආකර්ෂණය වන්නෙකු වීමේ සම්භාවිතාව 90%කි. මඳක් හිතන්න ඔබට ඔබේ ම වර්ගයේ අයෙකු ගැන ලිංගික හැඟීම් ඇති කර ගැනීම කොතරම් අපහසු ද කියා?
එලෙසම සමලිංගිකයන්ට ද සැබෑවට නොපවතින හැඟීම් ඇති කර ගත නොහැක.
හිතන්න,බොහෝ අය ප්‍රකාශ කරන පරිදි එය ‍තෝරාගැනීමක් වූවා නම් කිසිම බුද්ධිමත් පුද්ගලයෙකු විසින් තමාව විවේචනයට,ගර්හාවට ලක්වන,සමාජය විසින් අසාධාරණ පූර්ව නිගමනවලට එළඹ ඇති ජීවන පෙවෙතක් ‍තෝරාගනියි ද?
වගකිය යුත්තේ හෝර්මෝනයි,මානව තේරීම් නොවේ." 
 ඉහත දැක්වූවේ එම පොතෙන් උපුටාගත් කොටසක පරිවර්තනයයි.

එය කියැවූ අනේමන්දාට තමන් මේතාක් කල් වැරදි අවබෝධයකින් හුන් බව පසක් වුණා.

පොතෙහි pdf පිටපත පහත link මගින් කියවිය හැකියි.
Why Men Don't Listen & Women Can't Read Maps  (පි‍ටු 204-215)   

 පහුගිය දිනවල මුහුණු පොතේ සාමාජිකයන් දේදුණු පාටින් profile pictures වර්ණ ගන්වාගෙන ඉන්නවා කවුරුත් දකින්න ඇති.ඒ ඇයි කියලා සමහරු හරිහැටි දන්නේ නැතුවත් ඇති.
Jordan L. Schoen විසින් පළ කළ පහත ප්‍රකාශය ඔබට හේතුව පැහැදිලි කොට දෙයි.

"මෙය ලියන මම Straight ය. මෙහි ඇති Straight යන්නෙහි අර්ථය නම් මම මට ප්‍රතිවිරුද්ධ ලිංගික පාර්ශවය වන කාන්තාවන් සමග පමණක් කායික සම්බන්ධතා පවත්වන බවයි. නමුත් මා විශ්වාස කරන ආකාරයට ආදාරයට ස්ත්‍රී/පුරුෂ භාවයක් නොමැත. මන්ද ආදරය යනු ආදරය නිසාවෙනි.
ඔබ Straight වුවත් Homo Sexual (සම ලිංගික) වුවත් Bi Sexual (ද්වී ලිංගික) වුවත් ආදරය ආදරයම වන අතර කිසිදු වෙනසක් සිදු නොවේ.ඔබ ආදරය කල යුත්තේ කාටද යන තීරණය ගැනීම ඹබගේ අයිතියකි. තමන්ගේ ලිංගික පාර්ශවයට අයත් අයෙක් සමග සම්බන්ධතා පැවැත්වීම නරක වැඩක් වත් අසික්කිත වැඩක් වත් ලැජ්ජා විය යුතු දෙයක් වත් නොවේ. එසේ පවසන්නේ මෝඩ මිනිසුන්ය. කවුරුන් සමග ජීවත් වනවාද යන්න තීරණය කල යුත්තේ තමන්ය."

Celebrate Pride App එකේ තිබෙන දේදුනු පැහැති කොඩිය හදුන්වනු ලබන්නේ LGBT(Lesbian,Gay,Bi Sexual, Transgender) Pride Flag ලෙසයි.මෙහි තිබෙන වර්ණ LGBT සමාජයේ විවිධත්වය පෙන්වීමට යොදා තිබේ.එසේම මෙය ලොව පුරාම භාවිතා වන්නකි.

Celebrate Pride App එක බිහිවන්නේ LGBT Pride මාසය සැමරීමට වුවද ඇමරිකාවේ අධිකරණය මෙම සමාජ කණ්ඩායම් අතර විවාහ වීම නීති ගත කිරීමත් සමග ඉන් පැය කිහිපයකට පසු මෙය මුදා හැරුනි. ඒ අනුව facebook වෙබ් අඩවියේ සිටින ඕනෑම අයෙකුට දේදුනු පැහැය තම
Profile picture එකට එක් කර ගනිමින් තමන් ද එම විවාහ වලට සහයෝගය දක්වන අයෙක් බව පෙන්වීමට ඉඩ ලැබුණි.තේරුම් ගත යුතු වැදගත් කරුණ නම් කිසියම් සමාජයකට සහයෝගය දැක්වීමෙන් එම සමාජයේ කොටසක් නොවන බවයි.

Transgender නමින් හඳුන්වන තමන්ගේ පාලනයෙන් තොරව ලිංගිකත්වය වෙනස්වීමේ නොවැළැක්විය හැකි තත්ත්වය නිසා ලාංකීය සමාජයේ මිනිසෙකුට මුහුණ දීමට වන ඛේදනීය සිදුවීම් පිළිබඳව පහත ලින්කුව මගින් වැඩිදුරටත් කියැවිය හැකියි.

On Being Transgender in Sri Lanka
 
යමෙක් වෙනස් පුද්ගලයකු වූ පමණින් සමාජ විරෝධියකු ලෙස හංවඩු ගැසීම මනුෂ්‍යත්වය නොවෙයි.

කළ යුත්තේ සමලිංගිකයන් හෝ ද්විලිංගිකයන් සමාජයෙන් කොන් කිරීම නොව ඔවුන්ටත් සමාජයට වැඩදායී යහපත් පුරවැසියන් ලෙස කටයුතු කිරීමට සහයෝගය ලබාදීමයි.