Friday, May 22, 2015

නියත විවරණ


මේ කථාව දැන් අවුරුදු කීපයකට කලින් වෙච්ච එකක්.
ඒ කාලේ අපි පාසලේ දහතුන්වැනි වසරට පා තබපු කාලේ.
අපේ ස්කෝලේ ජීව විද්‍යා අංශය තිබුණේ පාසලේ අනෙක් කොටස්වලින් තරමක් හුදෙකලා වෙලා,කන්දක් මුදුනේ නිස්කලංක පරිසරයකයි.

ඉතින් සමහර වෙලාවට හවස ගෙදර යන්න කලින් අපේ පන්ති කාමර වහලා යන්න බැරි වෙන අවස්ථා තියෙනවනේ.සති අන්තයේ වගේ එහෙම දෙයක් වුනොත් අපිට අමතර කරදරයකට මුහුණ පාන්න සිද්ධ වෙනවා.
අයාලේ යන බල්ලෙක් පන්තිය ඇතුළට ඇවිත් පන්තිය ඇතුළේ විවිධ නිෂ්පාදන කරලා පිටවෙළා යන එක තමයි මේ අලකලන්චිය.ඉතින් උදේ පාන්දර පන්තියට ආවාම දකින්න ලැබෙන මේ මංගල දර්ශනය කොච්චර අලංකාරද,හමා එන සුගන්ධය කොයිතරම් මිහිරිද කියලා අමුතුවෙන් කියන්න ඕන නැහැනේ.


ඇත්තම කියනවානම් අපේ පන්තියට මේ කරදරේ සිදු වුණේ එකම එක දවසක් විතරයි.ඒත් එදාත් අපි කොහොමහරි විෂබීජනාශක බෝතල් භාගයක් ඉවර වෙනකන් පන්තිය සෝදලා තමයි වැඩ පටන් ගත්තේ.අවාසනාවට අපේ එහා පන්තියේ ළමයි නම් එච්චර වාසනාවන්ත වුණේ නැහැ.මට මතක විදියට ඒ පන්තියේ දොරේ අගුල කැඩිලයි තිබුණේ,එහෙමත් නැත්නම් බොහෝ දවසට දොර වහල යන්න මේ අසරණ දරුවන්ට අමතක වුණා.



කොහොම නමුත් පිරිසිදු කරන රාජකාරිය ඒ ඒ දවසට අතුගාන්න ඉන්න ළමයි කට්ටියගේ ඇඟේ ගහලා ලිස්සලා යන්න මේ ළමයි වගබලා ගත්තු බවයි ආරන්චිය.

ඒත් එක්තරා දවසකදී මේ වැඩේ අසාර්ථක වෙනවා.
බලු වසුරු ඉවත් කරන්න එක ළමයෙක්වත් ඉදිරිපත් වෙන්නේ නැහැ.

දැන් ඔන්න පන්තියට ඇතුළු වෙන දොරකඩම මේ බලු වසුරු තියෙනවාලු.

මුලින්ම උදේ රසායන විද්‍යා පාඩම තමයි තිබුණේ.ටිකක් විතර කට සැර ලතා මිස් (නම් ගම් සංශෝධිත බැව් කරුණාවෙන් සළකන්න)තමයි උගන්නන්න එන්නේ.
ඉතින් මිස් පන්තියට ඉස්සහරට ඇවිත් මේ සංදර්ශනේ දැක්ක ගමන් නහය කට අකුලගෙන මෙන්න මෙහෙම කතාවක් කිව්වා...

"ගිය අවුරුද්දෙත් මේ විදියට පන්තිය ඉස්සරහා බල්ලෙක් ජරා කරලා තිබුනා.
හැම ළමයෙක්ම ඒක උඩින් පැන පැන පන්තිය අතුළට ගියා.කවුරුවත් අස් කළේ නෑ.
ඒත් එකම එක ළමයෙක් තනියම මේ බලු බෙට්ට අයින් කළා.
මට හොඳටම මතකයි ඒ ළමයා first shyම medical faculty select වුණා!!!"

මේක ඇහුවා විතරයි අපේ කට්ටිය කඩි ගුල ඇවිස්සුනා වගේ කඩිසරව පන්තිය සුද්ධ කළේ නැතැයි.

ඔන්න ඉතින් ඊට පස්සේ ඒ පන්තියේ ළමයි කියලා තිබුණේ "මචං medicine යන්න ඕන නම් මේ අපි වගේ මුලින්ම  බලුබෙට්ටක් අයින් කරලා ඉඳපල්ලා" කියලයි.

4 comments:

  1. අළුත් බ්ලොග් එකක් නෙ. සුබපැතුම්.......

    ReplyDelete
  2. අලුත් බ්ලොගක් නේද?කළු පසුබිමේ සුදු අකුරු කියවන්නට අමාරුයි.හැකිනම් සංශෝධනයක් කරන්න බලන්න.සුබ පැතුම්!

    ReplyDelete
    Replies
    1. අදහස් දැක්වූවාට තුති හැලප;වෙනසක් කරන්න උත්සහ කරන්නම්.

      Delete